رحمت الله، خليفو: خليفو رحمت الله ولد خضر خان سهتو، 6 جون 1913ع تي ڳوٺ آيوءَ، تعلقي ناري، ضلعي خيرپور ۾ پيدا ٿيو. ويجهي دور جو هڪ بلند پايه شاعر ۽ ذهين طبع شخص ٿي گذريو آهي. پير مٺا سائينءَ جي خليفن مان هو.
12 اپريل 1920ع تي ڀنگو بهڻ اسڪول ۾ استاد غلام محمد خان ميمڻ وٽ تعليم وٺڻ لاءِ داخل ٿيو ۽ 1925ع ۾ فائنل پاس ڪيائين. اردوءَ ۾ به فائنل ڏنائين. ان کان سواءِ سنڌيءَ ۾ اديب فاضل جا امتحان ڏنائين. ننڍپڻ کان انتهائي ذهين ۽ تيز دماغ هو. پيشي جي حوالي سان پرائمري استاد هو. ديني علم ۾ سندس گهڻي دلچسپي رهي. تصوف جي ڄاڻ لاءِ حضرت روضي ڌڻيءَ جي ملفوظات جي مطالعي سان گڏ ٻين بزرگن جي حالاتِ زندگي، تاريخ ۽ فقھ جي ڪتابن جو به مطالعو ڪيائين. پير پاڳاري (اول) جي سوانح حيات تي مشتمل ڪتاب ڇپرايائين. ان کان سواءِ ملفوظات شريف ’اخبار الفقراء‘ ۾ شايع ڪرايائين.
سنڌي اخبارن ۽ رسالن ۾ مضمون موڪلي سنڌي ادب جي خدمت ڪيائين هن سهتا ذات تي به ڪافي ڪجهه لکيو آهي.
مرشد طرفان کيس خلافت جو خرقو به عطا ٿيو. مارشل لا جي دور ۾ کيس ۽ سندس خاندان کي ڪافي اذيتون ڏنيون ويون، کيس جيل حوالي ڪيو ويو ۽ سندس ڪجهه عزيز به ماريا ويا.
1913.06.06 عيسوي
خليفو رحمت الله ولد خضر خان سهتو، 6 جون 1913ع تي ڳوٺ آيوءَ، تعلقي ناري، ضلعي خيرپور ۾ پيدا ٿيو.